යහපාලනය (GOOD GOVERNANCE)

යහපාලනය (GOOD GOVERNANCE) යනු කුමක්ද ? එහි ලක්ෂණ කවරේද ? මදක් විමසා බැලීම වැදගත්ය. සරල අදහස ලෙසින් පාලනය යහපත්ව කිරිමයි. පාලනය යහපත්ව කිරීමට නම් ක්‍රියාකාරිත්වයට ඇති වගකීම වැදගත් ලක්ෂණයකි. නමුත් එහි අන්තයකට යමින් වගකීමේ නාමයෙන් ස්වාධීනත්වය පාවා දෙන තැනට යා යුතුද නැත, ඒ අනුව ධර්මයේද සදහන් වෙන මධ්‍යස්ථ ප්‍රතිපදාව අනුව සලකමින් මධ්‍යස්ථව පැවතිය යුතු කාරණයකි.

ලක්ෂණ සැලකූ කල්හි නිදහස් සාමකාමී, විදේශ ආක්‍රමණ වලින් තොර, දිනෙන් දින අභිවෘද්ධියට පත්වෙන තත්වයකි.

ඒ අනුව ශ්‍රී ලංකාව ඇත්තේ කිනම් තැනකද ?

- අතීතයේ ත්‍රස්තවාදයෙන් බැට කෑවද අද නිදහස් දේශයක් ඇත. එමගින් එකල ත්‍රස්තවාදීයා විසින් උදුරා ගන්නාලද පැවැත්මට අත්‍යාවශ්‍යම වන්නාවූ මානව අයිතිය වන ජීවත්වීමේ අයිතියට ඉහලම වටිනාකම ලැබී ඇත.

- කලට වේලාවට ඡන්ද පැවැත්වේ. ඒ අනුව ජනමතය වීමසීමට නිදහස් අවකාශය ඇත.

- මානව සංවර්ධනයද ඉහල තැනක ඇත.
http://www.lk.undp.org/content/srilanka/en/home/countryinfo/

අමතක නොකල යුත්ත නම් යහපාලනය ඉදිරියටද පවත්වා ගැනීම යන්න දේශපාලන ස්ථාවරත්වයෙන් වෙන් කල නොහැකි කාරණයක් බවයි. එය ඛණ්ඩ නොකර පවත්වා ගත යුතු බවයි. උදාහරණයන් මෙසේ දක්වන්නට හැකිය.

- ලී ක්වාන් යූ විසින් සිංගප්පුරුව වසර 30 ක පමණ කාලයක් පාලනය කරන ලදී.

- මහතිර් මොහොමඩ් වසර 22 ක පමණ කාලයක් මැලේසියාව පාලනය කරන ලදී.

- මාග්‍රට් තැචර් වසර 11 ක් පමණ කාලයක් බ්‍රිතාන්‍යය පාලනය කරන ලදී.

- ෆ්‍රෑන්ක්ලින්ක් රූස්වෙල්ට් වසර 12 ක පමණ කාලයක් ඇමරිකාව පාලනය කරනා ලදී.

- රට එක්සේසත් කල / ආර්ථික දියුණුවක් ගෙන ආ පුරාණ රජවරුන් වසර ගණනින් රට පාලනය කරනා ලදී.

යහපාලනය ඇතිකීරිමේ ප්‍රතිඵලය ලෙස ලැබිය යුත්තේ නම් පෙරදීට වඩා ක්‍රම ක්‍රමයෙන් එක්සත් භාවයක් කරා ලගාවීමකි. ඒසේම ස්වාධීනත්වයට කරනාවූ ඉල්ලීම් වලින් බැහැර වීමකි. එහෙත් යහපාලනය නොමැති යැයි චෝදනාව මත එය ඇති කිරීමට ගත් උත්සාහ වලදී දකින්නට ඇති තරමක් දකින්නට ලැබුණේ බෙදා වෙන් කිරීම්ය. ස්වාධීනත්වයේ නාමයෙන් වෙන් වීම්ය. එසේ වීමට අන්තර්ජාතික මැදිහත්වීම සාධාරණීකරණය කරන්නට වූයේ මානව හිමිකම් ගරු කිරීම හා ඒවා රැකීමේ අවශ්‍යතාවය ඉදිරියට ගෙන ඒම හරහාය.

පලස්තීනයෙන් රීශ්‍රායලය වෙන් වීම, සුඩානයෙන් දකුණු සුඩානය වෙන් වීම, ඉන්දියාවෙන් පාකිස්ථානය වෙන්වීම, ඉන්දුනීසියාවෙන් නැගෙනහිර තිමෝරය වෙන් වීම, ලොව පැරණිම විශාලම බලවත්ම වූ සෝවියට් දේශය බිද වැටීම උදාහරණ ලෙසින් දැක්විය හැකිය. ඔවැනි බෙදී යෑමක් හා ඉන්පසු කාලයක් තිස්සේ ඇදී යන දේශසීමා ගැටුම් ප්‍රතිඵල විය හැකි යැයි පලස්තීනය රීශ්‍රායලය සැලකූ විට නිතැතින්ම කල්පනා වෙන කාරණයකි.

ඒ අනුව නම් එය යහපාලනය යැයි හදුන්වාදීම යහපාලනය යන සංකල්පයට පටහැනි තැන ඇති කාරණයක් බව හදුනා ගන්නට හැකි කාරණයකි.

ස්වාධීනත්වයට යොමුවීම් ආකාර 2 කින් සිදුවිය හැකි බව පිළිගත් අදහසයි.

- අවිබලය භාවිතා කොට ත්‍රස්තවාදී ස්වරූපයෙන්  : ඉරාකයේ ISIS ත්‍රස්ත ක්‍රියා මගින් ස්වාධීනත්වය සෙවීමත්,

- නිහඩ ලෙස දේශපාලනමය වශයෙන්: සෝවියට් දේශය බිද වැටීම

ශ්‍රී ලංකාව තුල වෙනම ස්වාධීන රාජ්‍යයක් සෙවීමට LTTE සංවිධානය උත්සාහ කරනු ලැබුවේ අවිබලය භාවිතා කොට ත්‍රස්තවාදී ස්වරූපයෙනි. එය බෙදුම්වාදී ත්‍රස්තවාදය ලෙසින් හදුන්වයි. ත්‍රස්තවාදී ස්වරූපයෙන් වෙනම ස්වාධීන රාජ්‍යයක් සොයා යෑමේ අවකාශය අවසන් කර ඇතිමුත් දේශපාලනමය ස්වරූපය එනම් ඒ පෙරමුණ තවම ඉතිරිව තිබේන බව අහන්නට දකින්නට ඇති කාරණා අනුව අවබෝධ කරගත හැකි කාරණයකි. ඒ අනුව එවැන්නක් ප්‍රායෝගික වීමට ඉඩ නොදීම පිණිස පියවර තවදුරටත් ගත යුතුව ඇත. ඒ සදහා රටක් ලෙසින් ශක්තිමත්ව නැගී සිටිමට අවශ්‍ය වේ. ඒ සදහා ශක්තිමත් නායකත්වයක් අවශ්‍යමය.

උදාවී ඇත්තේ 2015 වර්ශයයි. අමතක නොකල යුතු තවත් කාරණයක් නම් අවුරුදු 200 කට පෙරද ජාතියක් ලෙසින් අපට වැරදුනේ යහපාලනයේ නාමයෙන් ගිවිසුම් විශ්වාස කිරීමට ගොස් බවය.

රෑ වැටුනු වලේ දවල් නොවැටීමට අප සැම වග බලා ගත යුත්තේ ඒ නිසාය.

විසෙන් විස නැසීම ලෙසින් කතාවකි. එසේම අස්ථාවරත්වය ඇති කරමින් යහපාලනයේ නාමයෙන් අන්තර්ජාතික නීතිය රට තුලට ඒම සාධාරණීකරණය කිරීම යන්න අන්තර්ජාතික නීතියට අනුවම වැලක්විය හැකිය. එනම් ජනතා පරමාධිපත්‍යය හරහා සමගිය විදහා දැක්වීම මගිනි. ඒ අනුව රටක දේශපාලන ස්ථාවරත්වය මනාව පවත්වා ගන්නා තුරු බාහිර මැදිහත්වීමකට ඉඩ නැත.

යහපාලනය ඇතිකිරිමට නම් ආඥාදායකත්වය පැරදවිය යුතු බවට අදහසකි. ආඥාදායකයකු යනු කවරෙක්ද ?

ඔය කියන්නා වූ ආකාරයේ අයකු පාලනයේ සිටී නම් මැතිවරණ පැවැත්වෙන්නට විදියක් නැත, ඒ අනුව මැතිවරණ වලින් ජන මතය උරගා නොබලන පාලන බලය ජනමතයට විරුද්ධව පවත්වා බලහත්කාරයෙන් පවත්වා ගන්නා අයෙකි. අප දන්නා තරමින් නම් එවැන්නෙකු මෙරටේ පාලන බලයේ නැත, සිටිනාවූ පාලකයාද ජනමතයෙන් පත්වූ අයෙකුය. නැවත වරක් ජනමතය උරගා බැලීම පිණිස ඡන්ද වීමසීමක් අපේ රටේ පැවැත්වීමට නියමිතව ඇතුවා සේම විපක්ෂයද ලහි ලහියේ ඊට සූදානම් වෙමින් සිටි. මේවා ප්‍රජාතන්ත්‍රවාදය ඇති රටක සිදුවන තත්වයයි.

ඒ අනුව ඔය කියනවා ඇත්තේ අපේ රට සම්බන්ධව විය නොහැකිය, ඒ මෙරටින් පිට ලෝකයේ වෙන කොහේ හෝ රටක තත්වයක් විය යුතුය.

ඒකාධිපතීන් / බලයට කෑදර පාලකයන් යැයි ඍජුව හෝ වක්‍රාකාරව නම් කරමින් ඔවුන් සිටිනතාක් කල් යහපාලනයක් නැති බව දක්වමින් යහපාලනය ගෙන ඒමට නම් ඔවුන් කෙසේ හෝ ඉවත් කල යුතුය යන අදහස කාවද්දමින් ඒ සදහා රැවටී ජනයා ඒකරාශී විම අනුව ක්‍රියාත්මක වෙමින් ඔවුන්ගෙන් රටවල් මුදවාගෙන යහ පාලනය ගෙන එන්නට යැයි කියා සිදු කල මැදිහත්වීම් වල ප්‍රතිඵල ලිබියාව, ඉරාකය අදටද අත් විදිනවා නො අනුමානයි !!!

යහ පාලනය යන්නට රටක අභ්‍යන්තර දේශපාලන ස්ථාවරත්වය අවුල් කරන්නට ඉඩ නොදීමේ වැදගත්කම අවබෝධ කරගන්නට ඉහත දැක්වූ උදාහරණ දෙක හොදටම ප්‍රමාණවත්ය... එයට තවත් රාජ්‍යයක් එක් කල යුතු නැත. එහෙත් එය මුලදීම අවබෝධ කරගත යුත්තකි. මන්ද අශ්වයා ගිය පසුව ඉස්තාලය වඩා වැඩක් නැති හෙයිනි.

ඒ අනුව යහපාලනය නම් සුන්දර වේශය මවාගෙන පැමිණිය හැකි දේශපාලන අස්ථාවරත්වය නම් සැබෑ සතුරාට ක්‍රියාත්මක වන්නට ඉඩ දුන හොත් එය එම ජනතාවගේ සැනසුම් සුසුම් හෙලීමේ අවසානය වනු ඇත...

යහපාලනය ඇතිකිරිමට නම් පවුල් පාලනය / ඥාතී පාලනය අවසන් කල යුතු බවටද අදහසකි. ඔය කියනා කාරණය ප්‍රශ්නයක් වී ඇත්තේ රටක විපක්ෂයකට පමණක් බව පෙනෙන්නේ නම් එය අර්ථසාධනීය විවේචනයක් යැයි නම් කල නොහැකිය. කෙසේ නමුදු ඔය කියනා අන්දමේ පාලනයන් ගනනාවක්ම දේශපාලනයේ නිරත වූ අවස්ථා අපට හදුනා ගත හැකිය.

උදා:

- ඩී ඇස් සේනානායක, ඩඩ්ලි සේනානායක, රුක්මන් සේනානායක, වසන්ත සේනානායක.

- සිරිමාවෝ බණ්ඩාරනායක, චන්ද්‍රිකා බණ්ඩාරනායක, අනුර බණ්ඩාරනායක

- ජේ ආර් ජයවර්ධන, රනිල් වික්‍රමසිංහ, රුවන් විජයවර්ධන.

- ඇමරිකාවේ බුෂ් පාලනය ...

- ඉන්දියාවේ ගාන්ධි පාලනය...

- එස් ඩ්බ් ආර් ඩී බණ්ඩාරනායක, සිරිමාවෝ බණ්ඩාරනායක, චන්ද්‍රිකා බණ්ඩාරනායක...

ඔය කවුරුන් වුව බලයට පත්වන්නේ මිනිසුන්ගේ ඡන්දයෙනි. මිනිසුන් කැමති නම් රටක විපක්ෂයක් කවරක් කීවත් පත් කරගැනීමෙ වෙනසක් නොවෙනු ඇත.

යම් පක්ෂයක් විපක්ෂයේම සිටින්නේ ඔවුන් බලය දරණාවූ පක්ෂයට සාපේක්ෂව පාලනයට සුදුසු නොවෙන බවට ජනතාව ජනමතයෙන් තීරණය කර ඇති නිසාය. ඒ රටේත් ජනතාවගේත් ආරක්ෂාව පිළිබද ආණ්ඩු බලය දරණා පක්ෂයක් විසින් දුන් සහතිකය විපක්ෂය විසින් දුන් සහතිකයට වඩා ජනතාව පිලිගත් නිසා බව කීමේ වරදක් නැත.

රාජ්‍යයට ජනතා පදනමක් සපයන, මිනිසුන් එක්ව ඇතිකරගත් සමාජ සම්මුතියක ප්‍රතිඵලයක් ලෙසින් හදුනා ගන්නා සමාජ සම්මුති න්‍යායද මෙහිදී වැදගත්ය. එයට අදාලව ගත් කල රාජ්‍යයේ සේවකයා ලෙසින් දේශපාලන විද්‍යාවේදී හදුනා ගන්නා ආණ්ඩුව විසින් කල යුතු වැදගත්ම කර්තව්‍යය නම් පාලිතයන්ට හෙවත් ජනතාවට ආරක්ෂාව සැපයීමයි.

අප ආණ්ඩුක්‍රම ව්‍යවස්ථාව අනුව ආණ්ඩුවේ ප්‍රධානීයා වන්නේ ජනාධිපතිවරයාය. ඒ අනුව ජනතාවගේ ආරක්ෂාව ඒ ධූරය සතු කර ඇත. ඒ ධූරයට පත් කරගත යුත්තේ ඒ ධූරය අඛණ්ඩව ජනතාව වෙනුවෙන් දරන්නට සූදානම් ජනතාවගේ ආරක්ෂාව පිළිබදව සහතිකයක් දී ඇති බවට දැනට සෑහීමට පත්වෙන්නට පුළුවන් / ජනතාව දැනටම පිළිගත් / ඉදිරියටද ඒ විශ්වාසය තබන්නට හැකි අයකු වෙතය...

සමාජ සම්මුති න්‍යාය අනුව සංවර්ධනයද වැදගත් අංගයක් ලෙස සලකයි. එය මේ වන විට සිදුවෙමින් පවතින කාර්යයක් බවට හදුනා ගත හැකිව ඇති අතර එයටද ශක්තිමත් නායකත්වයක් අවශ්‍යය.

පෙරදිග මුතු ඇටයයි මේ යන ගීතයේ

"නැගී සිටිය හැක එක්සත් වී බෙදී ගියොත් රට යයි සුන්වී..." ලෙසින් සරලව දක්වන්නේද එයමය.

මේ කාරණා අනුව රටක මනා ස්ථාවර භාවය සදහාත් ජනතාවගේ ආරක්ෂාව සැලකූ විටදී ජනතාව වෙනුවෙන් නැගී සිටිය හැකි ශක්තිමත් නායකත්වයෙන් වෙන් කල නොහැකිය.

ඒ අනුව අවශ්‍ය වන්නේ විධානය දීමේ බලය දිවයිනම නියෝජනය කරමින් දරාගෙන, දැනටද දේශපාලන ස්ථාවරත්වයක් ගොඩ නගා සිටින, ඒ තුලින් රට ක්‍රම ක්‍රමයෙන් ඉදිරියට යනාකාරයේ පාලනය මෙහෙයවීමක්ය.